حين كبرنا… تغيّرت الحكاية….

✍️/بقلم اعلامي صحيفة همة نيوز

المهندس /زكي عبدالرحمن الجوهر

……

كبرنا، فاكتشفنا أن ضحكة الأم كانت قناعًا على وجع، وأن صمت الأب كان خزانًا لألف كلمة لم تُقال.

كبرنا…
لين عرفنا ما في ضحكة تساوي ضحكة يمّه.
وكبرنا وفهمنا إن الدنيا مو مثل ما تبين، وإن الزينين ما يطولون، وإن الحياه ما تمشي دايم مثل ما نبي.
كبرنا يوم اللي كان يمسك يدنا صار ما يقدر يقوم بروحه.
كبرنا يوم فهمنا إن اللعب مو غاية، وإن الفرح ما ينشرى، وإن الأمان ما هو جدران… الأمان قلوب تحبك وتدفيك.

كبرنا…
وعرفنا إن الاعتذار ما ينقص من قدرنا، وإن الزعل مو معناه الكره، وإن اللي يروح ما ينتظر دايم وداع.
وعرفنا إن في علاقات كانت مؤقته، حتى لو وعدت بالبقاء، وإن في أحلام الله خلقها بس علشان نتعلم نحلم.
كبرنا يوم مرّينا على أماكن كانت تبكينا وابتسمنا… مو لأن الوجع راح، لكن لأننا تعافينا.

كبرنا…
وعرفنا إن اللي يحبك ما يجرحك، واللي يروح بدون سبب ما يستاهل يرجع.
وفهمنا إن القوّة مو بس نصمد، القوّة إن نعترف بضعفنا وقت الحاجة، ونطلب العون من الله ثم من الناس.
كبرنا يوم صار الحنين ثقيل، والذكريات صارت وطن فاضي.

كبرنا…
وعرفنا إن يمكن أحلى الأيام راحت، بس اللي جاي أحلى إذا أحسنا الظن بالله.
وفهمنا إن النضج مو بالعمر، النضج من التجارب اللي كسرّتنا ورجعنا أقوى.
كبرنا يوم صرنا نخبّي دموعنا بابتسامة، ونخبّي خوفنا بسكوت، ونكمل وكأن ما صار شي.
كبرنا يوم عرفنا إن راحة البال أغلى من أي فوز، وإن خسارة بعض الناس رحمة ما كنا ندري عنها.

كبرنا… ولسه نتعلّم.

ب

✍️/بقلم المهندس

زكي عبدالرحمن الجوهر